中環出更：譚Sir短袖唐裝衫佛誕威威
強積金制度推出至今差唔多已經十年，積金局尋日就搞咗個宣傳活動教市民投資，唔少同強積金歷史有關嘅嘉賓都有出席，卓妮見到民建聯主席譚耀宗着住件好有特色嘅短袖黑色唐裝衫去撐場。一問先至知，原來譚Sir件衫大有來頭，講嘅唔係佢出自名師之手，而係譚太喺北京旅行嘅時候專登買畀譚Sir嘅，難怪佢着上身時笑得特別開心啦！
老婆送贈 舒服好着
譚Sir話件衫其實好幾年前買落，已經唔記得價錢，不過佢同太太平時都唔奢侈，所以相信都唔會好貴。譚Sir仲同卓妮講話，其實好鍾意呢件唐裝衫，貪佢質料夠舒服，不過一直都無乜機會着，皆因佢成日都要去立法會開會，始終都係覺得着恤衫西褲先夠莊重，所以呢件衫成日都要孤獨地留喺佢衣櫃入面。適逢尋日係佛誕，加上呢個宣傳活動性質比較輕鬆，着唐裝衫就合適兼應節嘞。
尋日仲有唔少政界人士都畀面出席，好似自從中信泰富炒燶外匯之後就無乜出席公開活動嘅中信泰富前董事總經理兼積金局前主席范鴻齡、行會成員夏佳理同金管局總裁陳德霖嘅太太、積金局行政總監陳唐芷青，佢哋仲一齊為活動印下電子掌印，寓意無論去到邊，都一樣咁撐強積金。其中陳唐芷青都算係活動嘅其中一個主角，佢着咗一套金色衫褲，同強積金不知幾襯。
卓妮