政情：下戰書甩轆譚志源孭鑊
政治一日都嫌長。前日先吹勁風話中聯辦官員下周內會見終極普選聯盟，展開破冰會面。過咗唔夠廿四小時，煲呔曾尋日下戰書，單挑公民黨黨魁余若薇下月十七日喺政府總部進行電視辯論，點知單嘢竟然甩轆。
話說特首辦尋日朝早去信余若薇，抬頭先寫住「立法會議員」，跟住就稱呼佢做余議員。其後政府新聞處喺十點半發出新聞稿，刊出呢篇戰書嘅內容，但喺新聞稿首段導言中，竟然稱呼余若薇係「公民黨主席」。
嘩！有冇搞錯。公民黨主席係關信基，余若薇係黨魁。新聞處可能知衰，喺半個鐘頭後出稿修訂，寫番啱余若薇係黨魁。
中央及特區政府一向不承認所謂五區「公投」，強調今次只係立法會補選，但新聞稿卻寫明余若薇係「五區公投運動聯合委員會」總發言人，變相承認補選係「公投」，呢個真係錯得交關！
表面上好似今次係新聞處手民之誤，諗深啲，煲呔曾下戰書畀余若薇咁大件事，段新聞稿應該由特首辦親力親為，咁錯法，冇理由眼花呀！孭鑊嘅當然係特首辦主任Raymond譚志源喇。行軍打仗最重要認清對手，Raymond唔單止連老闆個對手都搞錯，仲一錯再錯，認真抵打！