政情：陳茂波燒鬚買英鎊坐艇
向來投資有道嘅會計界立法會議員陳茂波（Paul），投資港股及外幣經常大有斬獲，但面對近期英鎊下跌，都受連累要坐艇，事關阿Paul愛兒James喺英國牛津大學讀法律，唔多唔少都會換定啲英鎊備用，阿Paul去年呢個時間就以12個幾港元兌1英鎊匯價買入一批英鎊，點知依家跌到11.2，眼白白蒸發咗1蚊，分分鐘畀個仔使埋都未見到家鄉。
阿Paul揸住批英鎊坐緊艇，自然唔敢趁低吸納，事關低處未算低。問阿Paul估計英鎊幾時見底？佢就話：「我都睇唔通呀！」但佢話有需要都不妨入番多少喎。對於港股受外圍市況拖累變得風高浪急，小漲大回，跌破二萬點水平，記得阿Paul投資「大笨象」滙豐及中國海外都賺唔少，問佢會否趁低掃貨？今次阿Paul無講得咁明，好玄話會以不變應萬變喎，莫非暗示暫時唔買唔賣？