政情：甘威聆訊立會保安大陣仗
負責調查民主黨議員甘乃威涉嫌求愛不遂怒炒女助理嘅立法會有關委員會，尋日首次傳召甘威出席作供。由於甘威之前選擇咗以閉門方式進行聆訊，會前所有委員都簽晒生死狀，承諾一定唔可以將聆訊內容外洩。
尋日會議嘅保安安排，更加係立法會有史以來最大陣仗，會議室對出嗰一段走廊首次全面封閉，仲有保安人員全天候把守，嚴禁任何閒雜人等停留甚至經過，記者只可以喺離會議室門外足足五米遠嘅地方守候，連負責斟茶遞水嘅服務員都唔可以入內，嚴密程度仲高過特首出席答問大會，認真誇張！
記得當日同屬民主黨嘅涂謹申因匯標事件受審時，雖然都係閉門進行，但保安水平就同今次差天共地。據聞有關安排係由委員會主席梁劉柔芬提出嘅，目的係避免啲委員或證人行出行入去廁所時，會唔覺意畀行經門口嘅人偷聽到裏面嘅聆訊內容，真係諗得周密。
甘威尋日喺兩位律師行代表陪同下出席聆訊，喺樓梯口一見到記者，就立即耷低頭粒聲唔出，衝入平時畀政府官員使用嘅等候室，再由等候室側門進入會議室，散會時亦用同一途徑離開，加上會議室兩邊出口中間嘅走廊封咗，令記者兩頭跑都埋唔到佢身做訪問。立法會秘書處解釋，由於甘威今次係以證人身份出席聆訊，因此獲安排先喺等候室等待委員會傳召，唔算刻意走後門避記者喎。
