政情：阿爺落柯打拆彈

香港年輕人一直被指為政治冷感，不過喺高鐵風波中，年輕人圍堵立法會；最近幾次到中聯辦門外示威釀成衝突，走到最前嘅同樣係一班「八十後」激進分子。其實眼見特區政府疏導不足，中央已意識到問題嚴重，為免「八十後」激進文化好似雪球咁愈滾愈大，中央年初已正式將問題提上議程，要求各方多做工夫，將「八十後」爭取過來，防止更多年輕人走上激進、反政府之途。

據悉，中聯辦早前要求本地多個青年團體同大學生加強交流，大家仲分工負責唔同大專院校，香港青年聯會負責城大，菁英會就負責港大，至於最激嘅中大目前仲未有人肯認頭。

青年交流會 局長輪住上

特區政府尋日又宣布，青年事務委員會嚟緊會舉行一系列青年交流會，暫定舉行十場，每次都會按青年人嘅要求訂出唔同議題，聚焦討論。青委會早前搵咗民政事務局副局長許曉暉同青年人討論足球發展，下月二日就派出教育局副局長陳維安大談大專生最關注嘅免入息審查貸款計劃，六月底就輪到環境局局長邱騰華上場，總之大家輪住上。委員會主席陳振彬話：「搞論壇好過等八十後畀泛民主派誤導，泛民成日騎劫八十後，搞咗好多問題出嚟！」

青委會呢招，一來可以拉攏年輕人，二來又畀機會知名度近乎零嘅副局長多啲曝光，睇嚟係一石二鳥之計。港府日前又將兩段政改宣傳短片，放上年輕人最常瀏覽嘅分享網站YouTube，無非係想爭取「八十後」支持。不過呢場搶攻青年嘅硬仗會否成功，就要拭目以待喇！