中環出更：朱鼎耀打高球悟出生意哲學
觀瀾湖球會執行董事朱鼎耀（Tenniel）係全國政協委員朱樹豪嘅二公子，對高球有份情意結，佢喺加拿大多倫多大學修讀經濟後，再深造高爾夫球管理碩士，然後先至返港跟哥哥朱鼎健拍住上打理家族生意。Tenniel從高球中悟出一套生意哲學，就係做事前要好似打高球咁做足準備工夫，仲要保持高EQ（情緒智商）、平常心及專心投入，做事自然事半功倍，無往而不利！
Tenniel早前主持觀瀾湖一個高爾夫球賽時，曾經同卓妮分享打高球心得。佢話：「打高球唔同踩單車，唔係你學識咗就可以向前行，因為由風向到草紋，每一樣嘢都可以影響表現。每打一球都會有好多變化，唯一可以控制嘅係你有冇做好準備工夫。」
專心投入 事半功倍
不過，Tenniel話打高球都要享受過程，當然球與球之間可以輕鬆一啲，與朋友有講有笑，但到揮桿一刻就好似大老倌踏出虎度門，一定要專心同認真投入，不能Hea住打。Tenniel喺美國職業高爾夫球協會總部工作時，曾與不少頂級球員交手切磋，○一年開始幫手打理家族生意，國際高球巨星老虎活士（Tiger Woods）首度訪問中國，就係由佢組織策劃。
今時今日，觀瀾湖已成為世界極具規模嘅高爾夫球會，業務涵蓋餐飲、會議、水療、學院及鄉村俱樂部，仲染指房地產。房地產固然係搵錢之途，但長遠計，Tenniel希望可以透過高球提升人民生活模式及品味，令觀瀾湖長做長有。
Tenniel向前衝，背後嘅朱太Carmen功不可沒，由決策性女強人變成全職主婦，相夫教子。Carmen直言唔係好習慣，仲講笑話依家連轉數都慢咗，但見Tenniel身邊嘅Carmen嘴角綻放幸福笑靨，相信犧牲都係值得嘅！
卓妮