中環出更：保良飯堂餸菜有人情味
富豪飯堂大家就聽得多，社區飯堂又聽過未呢？卓妮講緊嘅係保良局嘅社區飯堂，為長者及有需要人士提供飯餸服務，究竟餸菜質素如何呢？保良局主席呂鈞堯（Quincy）日前親自帶隊，聯同副主席鄭錦鐘（Eric）、梁寶珠（Jacqueline）及總理陳細潔（Abbie），親身到藍田劉陳小寶長者地區中心嘅社區飯堂試菜，社區飯堂當然無鮑參翅肚啦，但大家食落卻感受到一份暖笠笠嘅溫情。
四人喺中午十二點踏入社區飯堂時，Eric已聞到陣陣飯香，皆因長者們已各自安坐準備用餐，長者一見四位保良高層就表現得好熱情，打招呼之餘仲爭相合照。當日適逢農曆四月初一，為迎合食齋嘅長者，午餐餸菜較為清淡，有雜豆肉粒扒玉子豆腐、花生黑豆黃耳鯪魚頭湯、生菜及白飯。卓妮心諗，平時歎慣珍饈百味嘅保良高層會唔會食唔慣呢？結果個個將飯餸食得一乾二淨，而且食得津津有味。
高層巡視 讚不絕口
Quincy嘅評語係餸菜無乜油，好清淡，啱晒長者。Abbie就讚飯堂餸菜夠新鮮，避免長者在家中捱冷飯餸菜，佢話：「好多長者買一條魚食幾日，焗完又焗，食咗都唔健康啦！」倡議今次巡視社區飯堂嘅Eric對餸菜好滿意，相信受惠嘅長者會感覺到保良嘅人情味。身兼社會服務委員會主席嘅Jacqueline透露，下個目標計劃在天水圍及深水埗開設社區飯堂。
試菜之前，幾位保良高層先帶卓妮參觀中心嘅設施，遇啱有長者正喺度耍玩土耳其麻雀同埋壽司麻雀，幾位高層感覺好新鮮，仲玩埋一份學摸壽司麻雀添，Eric隨手攞起一隻麻雀就話：「呢啲咪易摸囉！長者練吓指力都幾好喎！」
大家見長者玩得咁開心，一致認為開拓社區飯堂之餘，亦要做好配套設施以迎合長者身心發展，仲話搞出好成績先有理據向各界善長募捐喎！
卓妮