政情：吳清輝新職老婆詐型
浸會大學校長吳清輝六月底退休，之後將會出任北京師範大學與香港浸會大學合辦、位於珠海嘅聯合國際學院（UIC）校長，但被教職員質疑係內定人選。吳清輝尋日上電台為自己解畫，仲講到自己唔恨做呢個位。佢話係應校董會邀請出任UIC校長，老婆對佢呢個決定都好有意見喎。
吳校長又大吐苦水，話本港同內地有不同體制，喺內地辦學有好多困難和挫折，例如喺內地要同中央、廣東省、珠海等各級政府官員打交道，依家叫初有成效，所以佢未來做UIC校長嘅工作，就係同內地多個政府部門打交道，呢個亦係佢嚟緊最重要嘅工作。
至於出任UIC校長引起爭議，吳校長解釋話，校董會知道呢間院校係浸大重要項目，未來仍要面對好多挑戰，加上即將接任嘅浸大新校長要專注浸大香港校園工作，校董會想佢退休後做多幾年UIC校長，佢先至義不容辭下答應喎。吳清輝喺爭議聲中做UIC校長呢個位，睇嚟有好多人睇到實！