政情：余志穩預告有料爆
前社會福利署署長余志穩舊年喺一片掌聲之中結束官場生涯，好多人戥佢升唔正首長級第六級好唔抵，佢自己亦承認感到失望。佢仲預告遲啲會以普通市民身份，就政府資助市民置業嘅諮詢提出個人意見，睇怕「阿魚」大把料要爆。
余志穩當年以首長級第四級官階，署任首長級第六級嘅社署署長兩年，做到退休都未能升正。阿魚一直無咩怨言，但佢喺電台節目《舊日的足跡》入面，就流露咗一啲「反政府」行為，事關曾蔭權同成班官講明唔投票，但阿魚話要盡公民責任去投票，仲加多句話咁多年未試過唔投，擺明同港府對着幹。
佢話現時係退休前休假，到八月至正式退休。雖然佢表明唔會論政，但對房屋政策好有意見，佢話政府有責任為市民提供安居之所，所以等到三個月後，就會以普通市民身份提意見咁話，到時真係等睇好戲啦！