政情：「紅衫軍」挑釁劉夢熊未驚過
建制派杯葛城市論壇，難得全國政協委員劉夢熊願意獨闖龍潭，尋日上論壇激辯五區補選，搞到主持謝志峰忍唔住喺現場直播節目上大讚佢夠勇。不過，勇還勇，尋日社民連支持者「紅衫軍」紮行晒馬，想開戰咁款，所以，劉夢熊亦都有備而來，走嘅時候身邊多咗幾名男子幫佢開路，安全送佢出「紅」海。
城市論壇變「城市亂壇」，辯論場面日趨火爆，尋日喺五區補選日討論補選，有幾激可想而知，劉夢熊舌戰台下一班青年「紅衫軍」，火花四濺，搞到主持人都要叫大家君子動口不動手……指，發言時唔好用手指指人咁挑釁性。
維園阿哥主動握手
「紅衫軍」尋日特別疊馬，論壇連企位都被逼爆，主辦單位要拉閘限制進場人數，官方報數指現場出席嘅人數破紀錄，有成四百五十人。
論壇結束之後，「維園阿哥」任亮憲主動同劉夢熊握手講拜拜，但劉離開時照樣遭到「紅衫軍」尾隨挑釁。劉夢熊好淡定，面不改容，睇真啲，原來佢身邊除咗有警員，仲有幾名男子好似保鏢咁守住佢嘅前後左右，隔開「紅衫軍」，其他仲有啲男男女女，其中有個話係佢「粉絲」，無論咩人都好，總之就係有備而來，唔怪得劉夢熊可以咁淡定啦！