政情：阿爺發功政改又開戰

公民黨同社民連策動五區補選，建制派以不迎戰策略應對，降低投票率。據悉，中央研判，如果投票率介乎百分之十五至十七嘅低水平，即係戰略成功，一舉打殘公社兩黨嘅所謂「公投」議題；反過來若投票率高於此水平，六月二十三日政改方案表決呢場仗就更難打。所以補選結果將左右中央對政改大戰嘅下階段部署走向。

「誓師大會」呼籲撐政改

消息話，中央仍然希望通過政改方案，今日之後，中央、特區政府同建制派將迅即啟動政改戰機器，目的係爭取民意支持，所以未來撐政改嘅造勢行動將會一浪接一浪。好似上星期嘅香港工商界政改論壇，出席代表涵蓋晒總商會、中總、廠商會、工總、地產建設商會、僱主聯會、出入口商會同自由黨，中聯辦副主任李剛喺會上呼籲大家要齊齊出一分力支持政改，其實係一次「誓師大會」，呼籲各界撐政改。

不過，政界最關注嘅，莫過於中央同特區政府點樣拉普選聯嘅十四張票。普選聯喺政改路上同公社兩黨分道揚鑣，走上「溝通」路；但自從四月十四日特區政府推出寸步不讓嘅政改方案後，普選聯同中央嘅溝通之門，畀人感覺好似「嘭」一聲突然關上。

可靠消息話，其實大家完全捉錯用神，中央同普選聯道門根本從未打開過，亦無上鎖。呢句話真係可圈可點，直線思維解釋，中央從未同普選聯作實質溝通，但亦未絕到落閘放狗謝絕見客，即係停留於膠着狀態。

換個角度，就係顯示中央留有一手，等五區補選結束後，有可能真正開門見客，拉攏普選聯，殺泛民「鷹派」一個措手不及；至於出嚟見客嘅係京官定係中聯辦官員，一切就要視乎事態發展嘞！