中環耳目：Ian霍陪媽咪歎陸羽白肺湯
已故霍英東嘅二公子霍震寰（Ian）日理萬機，但幾忙都好，孝順阿媽一定唔懶得。霍老太呂燕妮鍾情傳統中式點心，Ian尋日就喺「陸羽茶室」同媽咪撐枱腳品茗，歎番碗馳名嘅「杏汁白肺湯」。
星期日歎茶分外寫意，卓妮尋日去咗陸羽歎一盅兩件，咁啱見到一身街坊裝打扮嘅Ian亦陪媽咪去食晏。有子相陪嘅霍老太容光煥發，耳珠戴上巨型珍珠耳環，貴氣十足。
陸羽夥計一見霍老太立即上前招待。以前霍老都經常嚟飲茶，Ian靜雞雞話畀卓妮知，霍家「有少少股份」喺陸羽，咁咪即係老闆之一？
Ian飲食口味好親民，柯打咗蝦餃燒賣等點心，當然冇錯過招牌湯水「杏汁白肺湯」。
陸羽嘅「杏汁白肺湯」喺名人圈人氣指數極高。煮白肺湯有竅門，大廚用上紅棗、豬肺、鹹白菜及杏仁等數十種材料熬湯，湯身呈奶白色，杏香四飄；切成小塊嘅豬肺亦有嚼勁。中國人相信豬肺湯有清肺解熱功效，天口熱飲最合時。
卓妮