中環出更：范太享陽光海灘

尋日沙田馬場有盛事，卓妮見到神采飛揚嘅全國人大常委范徐麗泰，問佢有冇去投票，范太話佢幾個月前已經話咗唔投㗎啦！原來范太啱啱喺加勒比海遊完船河返嚟，七日行程只係買咗一對沙灘鞋畀自己，同埋買咗變色T恤、變色手袋分別送畀囝囝同新抱，雖然戰利品唔多，但勝在旅途盡情享受世界級嘅陽光及沙灘，好似做咗Spa咁，滿載而歸。
啱啱坐完郵輪嘅范太尋日現身馬場，重申唔會喺補選中投票。 （葉華英攝）
啱啱坐完郵輪嘅范太尋日現身馬場，重申唔會喺補選中投票。 （葉華英攝）

范太話畀卓妮聽，今次旅程係佢喺網上搵到嘅，每位只需八百美元，好抵！於是佢叫埋姑仔范尚霞、囡囡凌華同埋女婿，一行四人把臂同遊。佢哋一行四人先由香港搭飛機到三藩市，再轉機至美國西岸海灘滿布嘅邁阿密（Miami），由嗰度乘坐世界頂尖郵輪公司旗下嘅嘉年華郵輪（Carnival），展開七日加勒比海之旅。

首站係聞名嘅巴哈馬半月灣（Half Moon Cay），呢個冇人住嘅熱帶雨林小島係旅遊熱點，遊客可以一試騎馬喺海灘漫步。

范太盛讚海水清澈透明，最令人嘆為觀止嘅係海水層次分明，由深至淺竟然有三種唔同嘅顏色。不過范太好懶，只係浸吓水，遊客最鍾意買手信，但范太好克制，佢話郵輪上咩都有得賣，佢用廿美元買咗對沙灘鞋，係成個旅程唯一買畀自己嘅禮物。

范太喺波多黎各首都San Juan行舊城。（范太提供圖片）
  • 范太喺波多黎各首都San Juan行舊城。（范太提供圖片）
范太喺San Juan舊城發現咗間中國餐館，但冇入去幫襯。（范太提供圖片）
  • 范太喺San Juan舊城發現咗間中國餐館，但冇入去幫襯。（范太提供圖片）
行程嘅最後一站係避世小島Grand Turk，范太（中）享受陽光與海灘，其身後就係今次乘搭嘅嘉年華郵輪。
  • 行程嘅最後一站係避世小島Grand Turk，范太（中）享受陽光與海灘，其身後就係今次乘搭嘅嘉年華郵輪。

買變色T恤送囝囝

跟住佢哋又去咗有全球十大最靚沙灘之稱嘅St. Thomas，呢個頗負盛名嘅加勒比海海灘備受推崇，因為佢有熱力四射嘅陽光、色彩奪目嘅小屋同幼白軟滑嘅細沙，所以連上岸都要遊客另外畀錢。不過范太對佢嘅評價麻麻，因為沙灘有落葉，明顯疏於打理，令人失望。

佢哋下一站去咗波多黎各首都San Juan，竟然發現咗間中國餐館，范太仲喺餐館前留影。行程最後一站係避世小島Grand Turk，島上有售賣喺陽光下會變色嘅T恤等產品，范太終於買咗件T恤同埋手袋，分別送畀囝囝同新抱，最後帶着愉快嘅心情返港。

卓妮