政情：李本瀅低碳生活Keep Fit

李本瀅尋日出席「香港減碳行動」閉幕禮暨嘉年華時，話自己每日都係以沙律同多士為主食，唔單只卡路里極低，連碳排放都非常少，再加上平時盡量行路，減少搭車，所以真係想肥都難嘞。佢仲話為咗買少幾件衫，一直都逼自己keep住依家呢個身形，唔畀自己肥。唔好以為台長得個講字，佢真係身體力行㗎，事關佢身上嘅恤衫同皮鞋都着咗超過十年，對鞋仲係佢太太送嘅添，睇嚟台長除咗環保，仲好長情。

男人就話可以唔買嘢啫，但係女人唔shopping就慘過畀蟻咬嘞。深明此道嘅區佩兒都話好難做到唔買嘢，所以買衫時只會揀啲襟興啲、比較classic嘅款式，唔着嘅舊衫每年就轉送朋友或者捐出去，務求做到零浪費咁話。