政情：方舜文迴避跳槽風波
前旅遊事務專員方舜文去年底辭職過檔貿易發展局做副總裁，搞到滿城風雨，我哋揭發佢唔使好似一般公務員咁先過冷河再轉工，之後為咗早啲返新工，最少放棄咗兩個月共三十幾萬薪酬，不過貿發局就暗啞底補貼咗佢部分損失。
方舜文自上個月返咗新工之後一直冇公開露面，難得前晚喺一個籌款晚宴上見到佢，梗係要問吓佢過檔嘅事。不過方舜文聽到問題即刻瞪大眼笑騎騎咁話冇嘢補充，盡顯耍太極嘅好功夫！
久未露面嘅方舜文尋晚一聽到關於佢跳槽風波嘅問題，已經想閃人，不過可能話晒都做過推廣旅遊工作，知道乜嘢叫做以禮待人，所以企定定同我哋寒暄幾句。方舜文一再強調，自己辭職係跟足正常程序，要講嘅嘢同政府早前出嘅回應一樣，唔會再有補充，講完後即刻封嘴，多一句都冇。
幾個月無見，方舜文除咗銜頭唔同咗，仲好似發咗福，唔知係咪新公司人工高、福利好，定係無官一身輕，身心舒泰先發福呢？