政情：張炳良擺明車馬唔投票

明日係立法會五區補選投票日，煲呔曾同三司十二局問責官員一直都唔夠膽公開投票意向，畀記者問到就詐聾扮啞、雞飛狗走。大部分行政會議非官守成員，連日來亦對會否投票支吾以對。反而民主派出身嘅行會成員張炳良「勇」字當頭，尋日朝早率先表態無打算投票，原因係佢一直認為佢班舊盟友冇必要以五區辭職方式表達意見，直截了當等大家唔使估。直至尋晚十點半，政府終於發聲明話，煲呔曾同佢嘅政治團隊周日都唔去投票，遲唔遲啲呀！