復建居屋之聲此起彼落，煲呔曾被逼埋牆角，上星期四託詞諮詢五個月再決定，擺明想拖到樓市見頂回落，咁佢就側側膊甩身，唔使觸碰呢件燙手山芋。煲呔曾想金蟬脫殼，無殼蝸牛嘅升斗市民點會放過佢，但有一個人仲肉緊，就係行政會議召集人梁振英（CY）嘞，尋日發表數千字鴻文，力指政府有責任協助市民置業，矛頭直指對復建居屋採取拖字訣嘅煲呔曾。至於CY嘅動機係為市民抱不平，定另有其他目的，咁就要問佢本人至知嘞。
CY尋日發表《樓市和住房》系列之五，羅列大量數據，力撐復建居屋，爭在無嗌口號：「復建居屋有理，追打煲呔曾無罪！」其中反駁自由黨常委田北辰嘅「公帑助居屋戶致富」論，話政府以前夠為廠家推工業廉價地啦，有乜唔妥先？明寸廠家出身嘅田二少。
CY同政府唱對台唔係第一次，○八年佢搶閘宣布工資保障運動失敗，力撐最低工資立法；早前佢又批評嗰啲指復建居屋會令樓價大跌嘅人係「住喺火星」，矛頭直指運輸及房屋局局長鄭汝樺，引起好大嘅回響。尋日佢追打煲呔曾，都唔算係啲乜嘢新聞囉。