政情：羅智成黑Look扮影子
台灣駐港機構光華新聞文化中心主任羅智成來港履新兩個星期，尋日應台灣工商協會及國際華商協進會邀請，第一次作正式演講，令人見識咗佢嘅好口才同埋天馬行空嘅思維。不過見佢又係着到成個黑衣人咁，黑色Polo恤襯黑色西褲，同早前我哋見到嘅佢打扮一模一樣，與前來聆聽演講嘅西裝筆挺男士形成鮮明對比。
羅智成笑謂屋企只得黑色衫褲，冇其他顏色，好似尋日咁嘅恤衫超過二十件都唔奇！原來佢保持咁嘅形象已超過二十年，自嘲鍾意扮到好似影子咁樣，哈哈！
雖然佢嘅形象只得一種顏色，但生活同埋思想卻色彩繽紛。尋日羅智成同大家分享《文創時代的野性思維》，主旨係教大家玩多啲，唔好成日工作；仲話若然將來有大學開辦「玩耍系」，甚至有「玩耍學院」，肯定係先知。佢覺得，依家人類生產過剩、知識過剩，但卻有過多焦慮同壓力，係時候尋求心靈上嘅新陳代謝。佢最鍾意去旅行，即使冇得去，都會隔段時間就去屋企附近嘅酒店住幾日，令自己有出埠嘅感覺。
羅智成連串「異端邪說」，逗得台下聽眾一陣陣爆笑，連台灣工商協會會長江素惠都笑言，聽完演講後就會執咗間公司，一於去旅行囉！