政情：五散人談補選殊途同歸
聽日就係立法會補選投票，繼建制黨派擺明車馬唔投票，立法會內嘅獨立議員亦逐步開始表態。五散人之一嘅廠商會代表林大輝日前講明唔投票，仲叫大家唔好墮入公民責任嘅迷思。
大輝認為今次選舉既嘥錢又唔自然，絕對唔會投票，又以打仗嚟做比喻，話大家都知殺人唔啱，但去到國難當前，為國殺敵就變成天經地義，今次投唔投票都一樣，雖然投票係選民義務同責任，但就唔應該喺一個錯嘅基礎上投票。
至於其他「散人」，有「五散人黨鞭」之稱嘅保險界陳健波話有投票意向，但唔會同大家講；醫學界「怪醫」梁家騮就話自己有七成機會唔投票，會計界陳茂波就話仲掙扎緊。IT界代表譚偉豪就話睇兄弟辦事。雖然五散人個個對投票都有唔同睇法，不過聽佢哋嘅語氣，相信最後都係殊途同歸嘞！