政情：煲呔曾步老董後塵?!
老董○五年腳痛提早落台，煲呔曾忽然上場，建制派就經常將曾特首叫錯做「董特首」，「董特首」三個字至今陰魂不散，尋日再度出現。立法會議員張學明尋日喺一個活動上致辭時，竟然將台上主禮嘅煲呔曾說成「尊敬嘅董特首」，五年前就話未慣啫，今時今日再講錯就顯得好邪門，莫非係暗示煲呔曾不得民心，將會步老董後塵腳痛提早落台嘅先兆？
新界社團聯會為慶祝創會二十五周年，尋日喺元朗大球場舉行「感受高鐵之旅」啟動禮，會長張學明致辭時介紹主禮嘉賓煲呔曾出場，竟然開口就話：「尊敬嘅董特首！」「董特首」三個字都字字鏗鏘，在場人聽得一清二楚，但張學明並無即時更正，似乎未有自覺講錯嘢，台上嘅煲呔曾就強顏歡笑，其他嘉賓亦保持鎮定，連微笑都唔敢。致辭完畢後，張學明返回座位後，即與鄰坐嘅煲呔曾咬耳仔，未知是否知錯耍冧。
接二連三被叫錯
一大清早噏錯嘢，一係未瞓醒，唔係就相當邪門。煲呔曾無心戀戰等退休，懶理施政劣迹斑斑，而且民望屢創新低，可見佢早已不得民心；大家咁順口叫錯佢做「董特首」，莫非係暗示佢將會步老董後塵，腳痛提早落台？加上仲係出自建制派核心嘅口中，睇落就更加玄妙嘞！
其實呢個又邪又玄妙嘅暗示早喺兩年前已出現。記得○八年七月喺黑龍江舉行嘅經貿合作交流會上，當時負責主持洽談會嘅黑龍江省常務副省長杜家毫，錯誤將煲呔曾稱為「董特首」，要由旁邊嘅人提醒後，才更正為「曾行政長官」。
第二次則喺同年嘅十二月，當時香港貿易發展局主席蘇澤光喺一個國家改革開放三十年嘅大型研討會上，亦將煲呔曾講成「尊敬嘅董特首」，見台下爆笑才更正為「董副主席」，其後又補鑊再講煲呔曾及老董「兩位都係特首」。
直到上星期特首答問大會，白鴿黨李永達喺提問房屋政策時，亦有意無意將煲呔曾稱為「董特首」，大家話係咪好邪、好玄妙呢？睇嚟煲呔曾係咪應該順應天意，自動提早落台呢？