中環出更：肥亨秘探正生嘆環境惡劣
曾經喺電台節目中為正生書院學生流下男兒淚嘅前商務及經濟發展局局長馬時亨，一直想親身入大嶼山芝麻灣探訪正生書院。前日有讀者報料，話見到肥亨同太太王培琪（Linda）乘搭離島渡輪到長洲，再坐駁艇到正生書院，就喺當日下午三時許，卓妮果然喺中環港外線碼頭外見到肥亨夫婦蹤影，佢哋啱啱坐船返嚟，全程由正生書院校長陳兆焯送行。
卓妮見到肥亨夫婦兩人外，仲有肥亨妹夫廖先生及外甥廖智亨，四人等候座駕期間，走到鄰近報攤買雜誌，仲即時揭嚟睇，無耐座駕駛至，四人上車離開。肥亨今次探訪正生學生相當低調，無事先張揚，莫非陳兆焯就遷校梅窩問題搵肥亨幫手？非也！肥亨澄清，陳校長只係想佢親身睇吓正生學習環境，為學生打打氣。
簡陋有倒塌危險
肥亨當日與百幾個學生會面傾偈，佢話發覺所有學生都好乖好有紀律，學識好多技能，完全睇唔出犯過事，大部分都改過自新，所以無論發生咩事，都唔應該對學生有負面睇法。
不過，肥亨覺得正生學習環境好差，校舍簡陋唔在講，仲有大石倒塌危險，好需要一間新校舍；但佢話無論正生搬去邊，都要由正生書院自行與政府協商。
不過肥亨慨嘆話：「我以為自己細個屋企貧窮無洗手間啫，估唔到現在咁繁榮都有環境咁差嘅學校，完全無法想像會係咁，睇到都唔開心！」肥亨話，正生學生嘅刻苦生活，外甥睇完都有所得着，慶幸無誤入歧途而要感恩，明白幸福非必然，要好好珍惜。
卓妮