中環出更：蔡關穎琴寄語丈夫穩健為雄
成功男士背後，唔少得一位賢內助。「福布斯」富豪、中華總商會會長蔡冠深都唔例外，佢太太蔡關穎琴（Janice）唔單止辯才出色，係前女律師會會長，為支持老公，巧妙地將著名書法家高劍父嘅作品「穩健為雄」，化成工作座右銘，提醒老公無論做人、做事，要穩健至上，咁至係真英雄。今日，蔡冠深已成為舉足輕重嘅富豪級人馬，成功背後，應該加埋「家有賢妻」四個字也！
Janice嘅辦公室十足一間小型藝術博物館，每個角落都係珍品。Janice先介紹牆上名畫，原來係當代著名藝術名家趙無極嘅版畫作，作品喺拍賣會上投得。Janice讚賞對方有才華，畫作抽象但意境豐富。
不過講到最醒神嘅作品，就係掛喺會客室正中央、由嶺南畫派領袖高劍父題字「穩健為雄」嘅字畫，呢幅字畫Janice幾年前喺拍賣會上投得，一見傾心。佢笑言，老公頭腦精明，但做事較心急，Janice望見「穩健為雄」四個字，腦袋即時「叮」一聲，馬上投來送畀老公，作為座右銘。
Janice珍藏清朝康熙、雍正同乾隆皇帝嘅書法真迹，呢日就攞出一幅康熙嘅墨寶畀卓妮開吓眼界。據聞每幅真迹近年已漲價至數百萬元。
搵王梓軒作曲宣揚禁毒
Janice熱心公益，為關注年輕人沉淪毒海嘅問題，近日以女童軍港島地方協會會長身份，搞咗個「無毒新SING」歌詞創作比賽，請嚟港區全國人大代表王英偉嘅公子王梓軒為比賽創作兩首曲，仲邀得世界級大提琴家李垂誼以琴聲演繹得獎作品。
Janice話，要子女遠離毒品，最好用活動教學方法，唔可以一味說教，所以佢帶大仔參觀喜靈洲戒毒所，同戒毒者傾偈，等佢哋明白毒品禍害。今次舉辦填詞比賽，都係憑歌寄意，希望年輕人將禁毒訊息背到琅琅上口，不知不覺潛移默化，向毒品Say No！
比賽咁有心思，城中名人舉手贊助，包括「零食天王」戴德豐太太戴胡美蓉、名醫陳曦齡，仲有新鴻基地產等等添。大會已開始接受報名，比賽呢個月尾截止，想提交作品就要快啲手喇。
卓妮