中環出更：錢果豐逛超市掃靚紅酒
港鐵無風無浪下月起增加票價，港鐵主席錢果豐（Raymond）心情顯得好輕鬆，早幾日下午茶時間一支公喺中環ifc國金中心間City’Super行街，相當寫意。卓妮見Raymond行到洋酒區，職員隨即上前打招呼叫聲「錢先生」，看來似係熟客仔買慣買熟，只見Raymond不斷按電話睇資料，無耐就離開轉去睇其他貨品區域。
買人氣蕎麥麵
卓妮打聽到，原來Raymond想買法國隆河區嘅Barbe Rac Chateauneuf-du-pape 2007紅酒，原本舊價每支約一千九百幾蚊，但最近來貨貴咗，加到二千四百蚊一支，仲要無存貨，職員翻查電腦紀錄，幾經辛苦先至喺其他分店搵到三支存貨，於是落柯打留起，待稍後返貨後再通知Raymond提貨。Raymond離開洋酒區後，繼續邊行邊睇，一直行到推廣東京江戶食品嘅區域，點知又買到好嘢。
Raymond睇中享譽日本嘅東京麻布十番「永坂更科」布屋太兵衞蕎麥麵，隨即一手攞起兩包蕎麥麵及兩支醬汁，然後到收銀處以信用卡付款離開。據聞Raymond曾經喺日本試過呢隻蕎麥麵，覺得好好味，依家見到City’Super有得賣，而且又係新鮮由日本空運到港，所以就買返屋企煮嚟食。
Raymond離開City’Super後就走到大廈外，登上一部黑色LEXUS（凌志）LS600hL座駕離開。部凌志房車係Raymond以個人名義擁有，原來大有來頭。部車○七年出廠，車價連稅一百四十三萬元，為全球首部油電混合動力嘅頂級豪華房車，搭載五公升V8引擎，動力澎湃，但做到慳油環保目的，當然唔夠搭鐵路咁環保啦！
卓妮