政情：金勞詹兜番美麗誤會

金勞詹話兩個月前佢苦苦思索點樣令政改方案通過，終於畀佢諗到一條獨步妙方。首先，建制派否決補選撥款，令五名民主派議員無法返回議會，即立法會只有五十五名議員；然後，港府定義「全體議員」為五十五人，㩒一㩒計數機，通過政改方案所需嘅三分之二議員，就由四十人變為三十七人，呢個數唔多唔少，啱啱就係建制派議員嘅總人數，所以，金勞詹計埋立法會主席要辭職，咁咪走去游說佢認為最有機會應承接手做立會主席嘅阿基囉。

金勞詹條橋係咪天馬行空，大家自行判斷。不過，講乜都假，一切已係明日黃花，補選撥款已通過，「全體議員」亦已定義為六十人，反而，依家最失望嗰個可能係阿基，原來獲「欽點」做立法會主席，只係一場誤會。