政情：朱鑫源讀錯自己個名

話說尋日我哋喺稅務局記者會上見到局長，即時把握機會問清楚佢個名應該點讀。局長就笑笑口咁話，個「鑫」字有好多讀法，好多人都會讀錯，而佢個名嘅「鑫」字，應該讀成樹蔭個「蔭」喎。

我哋尋日向城大中文翻譯及語言學系助理教授藺蓀查詢時，佢就話根據香港語言學學會粵語拼音字表同《商務新辭典》，「鑫」字只能讀成「陰」，無論點都冇理由讀成「蔭」喎，「股票都有一隻叫『新疆新鑫（音：陰）』啦！」

對於朱局長讀錯自己個名幾十年，藺教授就話，好多人出世改名時，屋企人讀乜佢就讀乜；如果連自己個名都唔緊張時，讀錯自己個名都唔係冇可能嘅事喎。