政情：葉劉開班補習唔tip題
前保安局局長、立法會議員葉劉淑儀嘅英文不嬲都出名勁，加上佢強悍嘅性格，簡直就同典型英文老師嘅形象不謀而合。葉劉舊年暑假首次開班教中學生英文，好評如潮，今年佢趁立會休會期間再過老師癮，仲話要用最古老傳統嘅方法，執吓時下學生嘅英文文法喎！
葉劉嘅匯賢智庫學苑今年獲優質教育基金撥款資助開辦暑期班，葉劉就主打教英文文法，今年佢仲會再下一城，開足三班添。葉劉話舊年佢開班時，改學生嘅作文改得好認真，每份都寫好長嘅評語畀佢哋，學生收到後唔單止好感動，仲猛話啲補習名師同佢冇得比添！
葉劉又大鬧當年嘅教育局硬推互動教學，唔着重教文法，搞到依家新一代學生嘅基本文法錯得好緊要，所以佢會以最古老傳統嘅教學法，即係叫學生不斷作文，去糾正佢哋嘅根本錯誤。不過佢話自己係用心搞教學，同出面嘅補習社唔同，唔會幫佢哋tip題目，希望可以收到啲真係有心學英文嘅學生。