政情：吳清輝大整蠱一笑置之
快將卸任嘅浸大校長吳清輝，臨走前遇上大整蠱，先有神秘人放料，指吳清輝會將一年薪酬捐畀內地做善事；再有報章質疑佢解僱員工，用人唯親，是非接二連三。吳校長話，唔知邊位仁兄咁大整蠱，對謠言一笑置之。
謠傳捐出一年薪金
浸大是非多，但無損善長捐錢熱情。由浸大校友李如樑揸旗嘅「中國富強基金會」，尋日捐出三百五十萬元支持大學發展，校友咁熱情，吳校長同浸大校董會主席王英偉親自出馬收支票。
講起捐錢，吳校長早前畀人傳佢將一年薪金逾四百萬元，捐畀「中國希望工程」，我哋問吳校長，佢話單嘢係流料。吳校長苦笑話，唔知邊位造謠，但對方認真「睇得起佢」喎。
吳校長呢排好「惹火」，收完支票畀傳媒追問浸大人事風波單嘢，佢一臉無奈話，無論解僱員工或任命副校長，都係按既定程序做，問心無愧。對於外傳吳校長退休後將出任北京師範大學──香港浸會大學聯合國際學院（UIC）校長，浸大發言人話，UIC創校以來，吳清輝一直兼任該校校長，任期到今年六月底，係咪續任，要由UIC校董會決定。