政情：阿Paul戰直選 白姐姐開路？

白姐姐早前失驚無神宣布參選九龍西，最初大家百思不得其解，有一套陰謀論，更猜測佢喺背後受人指使，狙擊社民連黃毓民。不過，有地區人士指，至今未收到要暗撐白姐姐嘅動員指令喎，反而白姐姐為「法律超人」阿Paul鋪路選九西嘅傳聞，則甚囂塵上，為二○一二年立法會選舉部署提早拉開戰幔。

解畫口徑不一

拍過疑似裸照嘅阿Paul，○八年喺旅遊界以爆冷姿態勝出，消息話，當時阿Paul僅以九票之微險勝自由黨董耀中，兩年後，阿Paul面對嘅真正對手，可能係經濟動力力捧嘅新任旅遊業議會主席胡兆英，更加兵凶戰危，可能因為咁樣，阿Paul及早籌謀開定一個可以「走位」嘅太平門，而直選五區中，則以較少重量級人物參選、票源較分散嘅九龍西，最易入位。

所以白姐姐競選，無論洗樓、出席論壇抑或街頭嗌咪，阿Paul幾乎形影不離，仲煙韌過舊年「青島張茆」風波後復合嗰陣，究竟係阿Paul幫白姐姐助選，定係白姐姐搶閘幫阿Paul拉票造勢，真係好難分清楚㗎。阿Paul同白姐姐一直被喻為現代版「楊過與小龍女」，成為城中傳奇，依家更變身政壇神鵰俠侶，印證呢段廿載情經歷「青島張茆」風波後依然互相扶持，不離不棄。

我哋就傳聞打電話畀白姐姐，佢話，同阿Paul政治立場不同，二人甚少談論呢方面事情，叫我哋直接問阿Paul。阿Paul則話，無諗過轉戰直選，白姐姐參選亦與佢無關，指傳聞純屬推測。白姐姐同阿Paul平日言行合拍，心有靈犀，點解講到呢個問題，口徑咁唔一致嘅？

無論點都好，白姐姐征戰直選，都係勇氣可嘉。喺5.16補選中，參選九龍西嘅候選人其實仲有黃毓民、佘繼泉、郭兆明、蔣世昌、黃永志、張錦雄，以及成日狙擊白姐姐嘅林依麗。