中環出更（二）：趙國雄LV領呔輕柔華貴
一向品味不凡嘅長實執行董事趙國雄（Justin），出席長實嘅推廣活動時總是悉心打扮一番，次次出場都令人眼前一亮，交足功課！尋日Justin同卓妮講，佢九成嘅西裝都係喺土耳其訂造，皮鞋就鍾意買法國出品，貪佢鞋形又長又大，啱晒佢咁高大嘅身形。
土耳其訂造老西
上周Justin出席長實旗下「1881」促銷活動時，卓妮見佢打咗條LV粉紅色真絲領呔，襯Pierre Cardin直紋西裝，狀態弗極。當日Justin坐住懷舊嘅人力車出場，一貫玩嘢搞笑本色。卓妮讚佢身光頸靚，佢笑言拋身出嚟做活動，自然要着得好啲！領呔從來都係男人重要嘅領地，Justin當日打嗰條LV呔係自己買嘅，條領呔係以小圓點拼成一個個LV經典Monogram花卉圖案，望落輕柔華貴。
尋日卓妮又搵Justin傾閒偈，佢話套西裝料係Cerruti 1881，係喺土耳其搵相熟嘅裁縫度身訂造，佢九成西裝都係喺土耳其做。Justin話，通常佢會飛過去訂造，但如果冇時間就會打電話落柯打，然後由土耳其寄返嚟香港。佢話同樣嘅布料如果喺歐洲訂造，貴過土耳其好多。估唔到Justin除咗賣樓叻，仲好識計數。
卓妮