中環出更（一）：李雲迪琴藝迷倒曾浩輝
上周啱啱攜手出席旗下淺水灣樓盤活動嘅華懋集團主席龔仁心伉儷同兩個細妹龔中心、龔因心，尋日又以「四人組合」出現喺華懋位於黃竹坑嘅南灣海景酒店，為華懋贊助嘅「傑出青少年音樂家大獎」揭幕禮助陣，一出場就贏咗個勢。現場都有唔少星級嘉賓出席，鋼琴王子李雲迪、衞生防護中心總監曾浩輝都嚟撐場。原來曾浩輝係李雲迪嘅粉絲，會後仲追住鋼琴王子攞簽名添！
咪睇曾浩輝平時好嚴肅咁教大家點樣保持衞生、打流感針，查實佢嘅生活都好有趣。佢話自己係音樂愛好者，平時喺屋企或車上都會聽吓古典音樂，尋日見到偶像李雲迪，仲自爆個心卜卜跳添！原來曾醫生彈鋼琴已達演奏級水準，仲曾經喺籌款活動上露過一手，難怪佢會視李雲迪為偶像。
龔仁心撐青少藝術活動
十年前李雲迪喺蕭邦國際鋼琴比賽中大放異彩後，即時成為家喻戶曉嘅星級演奏家，尋日受邀嚟主持揭幕儀式，並同大家分享比賽經驗。第二屆「傑出青少年音樂家大獎」總冠軍、現年十六歲嘅單簧管好手賀蓁（Natalie）問佢，點樣紓緩演奏前嘅緊張情緒，李雲迪話有適當嘅壓力係好事，不過演奏時嘅體力同精神消耗好大，所以，如果佢晚上有演出，下午就會瞓二、三個鐘放鬆吓！
至於第一屆總冠軍、今年十四歲嘅鋼琴小子沈靖韜（Aristo），現時就讀拔萃男書院，佢話四年前勝出後對於佢嘅生活冇咩大影響，不過最大好處係喺學校冇人夠膽打佢，哈哈！
Aristo同Natalie仲即時演奏名曲以饗現場嘉賓，大家都沉醉於片刻寧靜。龔仁心見到兩位後生仔咁出色，都話要多啲支持青少年嘅藝術活動，為社會創造更多精神財富。佢啱啱同陳振聰打完爭產戰，唔知係咪有感而發？
卓妮