食署亂屈保安無牌擺賣

無端惹禍的歐先生任職保安員，駐守添馬艦新政府總部建築地盤。歐指每日午飯時間，附近茶餐廳便會以手推車將外賣飯盒運往地盤門口，供工友領取。事發當日，食環署職員到場巡視，為免工友「冇飯食」，歐遂着茶餐廳東主將飯盒推至地盤門口。

豈料，食環署職員突然掩至並「拉人封飯」，更誣衊歐賣飯，「個老闆已經即場認咗啲飯係佢嘅，而且一睇我着住制服就知我係保安啦，咁都屈我！」未幾，該署職員又改口控以阻街，「明知唔係我賣飯就告我阻街，啲嘢都唔係我嘅，點阻街呀？」

記者實地了解時，食環署職員不斷着工友「放好」工具，對飯盒卻視而不見。

建築地盤工人每日均靠外賣飯盒解決午膳。

恐小事化大認罪

記者曾實地了解，發現茶餐廳東主約於上午十一時半便會推着飯盒抵達地盤，未幾即有食環署職員到場，並大聲告誡，「你哋唔好將啲嘢（盛載飯盒的發泡膠箱）亂咁放呀，如果唔係就拉你㗎！」職員大約逗留十五分鐘後離去。

歐表示食環署職員幾乎每日午膳時間到場「監察」，對送外賣與賣飯情況瞭如指掌，不滿無端「被屈」，「官字兩個口，我哋啲小市民根本冇得同啲官鬥，如果係咁打官司，想唔攞綜援都幾難！」歐為免小事化大，最終選擇認罪，被判罰款二百元。

「保安同啲飯有乜關係？點解啲飯擺喺度要告個保安？係咪求其咗啲？」立法會食物安全及環境衞生事務委員會委員王國興認為，事件中食環署的做法大有商榷餘地，直指打擊非法販賣不力，容易冤枉良民，促當局加強巡查並搜集足夠證據，以取締真非法販賣活動。

法律界人士黃國桐坦言，小市民通常「怕麻煩」，寧願被罰款了事。不過，黃認為倘有足夠證據證明自己清白，便應該據理力爭，「總唔能夠隨街執啲嘢認係自己阻街㗎嘛！」

食環署發言人未有就保安員不滿「被屈」一事回應，只重申該署職員會依法巡查，倘有足夠證據會提出檢控，並指任何人如無合法解釋而在公眾地方留下任何物品，並造成阻塞或不便，即屬違法，最高可被罰款五千元或監禁三個月。

記者 蕭智湲