政情：首宗雷曼處分葉約德失憶？

星展銀行行政總裁葉約德尋日第四次上立法會為雷曼事件作供，議員涂謹申問佢話，舊年首宗因售賣雷曼產品被金管局紀律處分嘅銀行職員，正嚟自星展，佢從中發現咩缺失呢？點知葉約德話佢要處理嘅雷曼個案成二千七百宗，自己唔記得呢單嘢嘅詳情喎。聽佢咁答，阿涂火都嚟埋，大鬧話呢單嘢係全港第一單，佢應該發夢都記得先啱！連小組主席何鍾泰都忍唔住插嘴，一再提醒葉約德宣咗誓。不過葉約德依然好似個失憶證人咁話唔記得，總之就係唔記得！