財政司司長曾俊華今年嘅財政預算案扶貧措施不足，遏抑樓價無力，畀泛民政黨及獨立議員窮追猛打，破天荒提出九個修正案，搞到無辦法一日表決預算案，上周四舉行嘅行政長官答問大會都要讓路到本周五，但就撞正已故全國政協常委徐展堂嘅追悼會，一開始或冇留意到呢個問題嘅特首辦就話收到建制派議員要求改期，煲呔曾惟有拿拿臨通知立法會主席再度過，要拖到下周四先去立法會做答問大會，結果泛民尋日狂轟雙曾同部分議員搞亂立會。
公文袋余若薇大鬧特首辦漠視立法會程序，將個別議員嘅意見當成整個立法會嘅意見，自把自為，應該向立法會道歉。
白鴿黨副主席劉慧卿就質疑點解立法會主席收到特首辦通知時冇通知內會主席劉健儀（Miriam），反映立法會畀雙曾同部分議員搞到「禮崩樂壞」，話煲呔曾冇尊重立會，第日再有同類情況唔可以繞過內會。立會已日嘈夜嘈，依家雙曾又畀位泛民上，立會想安寧都幾難！