政情：田少撐哪吒冧爆o靚妹
官仔骨骨嘅自由黨前主席「田少」田北俊，多年嚟穩佔政壇「師奶殺手」榜上一席位，尋日佢為撐愛徒「哪吒」方國珊，殺入將軍澳商場茶樓，陪三百位大媽提早慶祝母親節，頓成全場焦點。
田少撐哪吒，有心有金，贊助二千蚊百佳券做抽獎禮物，又親自頒獎，冧盡將軍澳師奶兵團，曲線為本身係西貢委任區議員嘅哪吒拉票，助佢明年轉戰直選。不過，田少攫取女人心，無選票嘅一樣中招，自由黨常委曾志洪嘅小孫女同田少好啱傾，二人仲當眾咬耳仔，田少細細聲講：「介紹個靚仔你識吖。」然後喺銀包掏出愛孫「俊仔」嘅帥照，唔怪得田少對住呢位小妹妹咁胸有成竹啦。
田少同哪吒師徒情誼深厚，除咗現身自由黨活動，上個月田少更喺山頂大屋設宴，同約十名相熟黨友為哪吒慶牛一，由田太親自落廚，整正宗上海菜，據聞當中以熏蛋同菜膽翅最正，田少仲送出私伙八二年Lafite紅酒，每人一支，令大家好感動，難怪連o靚妹都氹得掂。