政情：王國興題詩寸爆Eva鄭
社民連三子仲喺議會嘅時候，上立法會為政策解畫嘅高官周不時都收到佢哋嘅「勞作仔」，不過自佢哋辭職後，已經冇呢支歌仔唱嘞。上星期三立法會開大會，工聯會議員王國興都有樣學樣，親手題咗首詩送畀運輸及房屋局局長鄭汝樺，寸爆佢用嚟壓抑樓價嘅「九招十二式」冇立法路線圖，佢手字仲寫得好靚添。
原來王國興細細個時，爸爸已經教佢執筆練字，喺小學時仲贏埋學界書法比賽，人仔細細已經喺大會堂即席揮毫。佢記得當年因為家貧，過年曾經同爸爸「父子兵」落街擺檔賣揮春幫補吓，佢話好多街坊讚佢手字掂，年年都賺到唔少錢喎。
眾所周知，Eva鄭寫書法好了得，手字未必會比王國興輸蝕。王國興尋日就話，好多年前喺立會會議上，Eva鄭曾經用鉛筆寫過張字條畀佢，當時佢已經覺得佢手字係咁多高官之中最好，仲自爆因為咁，先特登題首詩贈畀Eva鄭添，佢話依家啲官好怕收議員嘅禮物，我「以文會友」，Eva鄭就冇辦法拒絕接收啦！