政情：羅智成現身光華條氣未順
台灣駐港機構、光華新聞文化中心主任羅智成，上周四抵港履新，我哋周二喺光華見佢首次蒲頭，雀躍之情溢於言表。原來佢太太下個月臨盆，佢嘅新詩集都差唔多時間出版，佢唔怪得佢充滿迎接新生命嘅喜悅。
羅智成係台灣嘅知名詩人，初來乍到，佢笑謂連呼吸都未順暢，家小也還在安頓中，依家仲未決定喺香港或台北生ＢＢ。不過，佢當務之急係搵番幾位香港嘅詩人老友，例如北島、也斯，仲話要搞個「讀詩會」添。
當晚光華邀請咗來自台灣嘅亞視行政總裁胡競英以「活出美麗，活出豐盛」為題發表演講，有幾百人捧場，觀察敏銳嘅羅智成即時話現場應該擺番部咖啡機，事關書香、咖啡香，正是台灣文化界令人熟悉嘅味道，轉數好快！
講番胡競英，佢同永遠廿五歲嘅校長譚詠麟拍過戲，原來佢就係當年嘅女星胡冠珍，難怪甫開場就被主持人戲稱今年廿一歲，事關佢細譚校長四歲。不過五十一歲嘅佢從唔介意講真實年紀，理由好簡單：「今天永遠都是我這輩子最年輕的時刻，所以我要好好混！」