政情：張震遠冧莊三年
政府尋日宣布市區重建局主席張震遠冧莊做多三年，同時委任兩個新血加入市建局董事會，一個係建築師廖宜康，佢爸爸係港英年代嘅高官廖本懷，媽媽係芭蕾舞蹈家毛妹，成名作係參加西九文化藝術區設計比賽得到亞軍，輸畀英國大師Norman Foster嘅天幕設計；另一新血係「住好啲」老闆楊志超。「住好啲」賣傢俬之餘亦大賣本土文化，出位之作有諧音粗口Ｔ恤「delay no more」，張震遠冧莊之餘搞gag話，第日「delay no more」就係市建局口號，寓意重建項目唔會一拖再拖，速戰速決！
張震遠拆咗喜帖街同永利街兩個大炸彈，而且成日落舊區去接觸居民，連發展局局長林鄭月娥都話同佢好合拍。張震遠同林鄭一樣好打得，冧莊做多三年，一啲都唔令人意外。娥姐尋日喺新聞稿中繼續盛讚張震遠高瞻遠矚，係一位不可多得嘅領導人才，捧到佢上天咁滯。
兩新人入局 三樣改變
畀娥姐讚完，張震遠尋日下午出席百子里活化項目動工儀式時心情相當好，話好榮幸再獲委任，等佢有機會繼續服務舊區居民，為佢哋多做啲事。對於兩位新加盟嘅市建局董事廖宜康同楊志超，張震遠都好幽默話，佢哋兩個為市建局董事會帶嚟三樣改變：第一係平均年齡下降，言下之意話佢哋後生；第二係平均高度增加，事關張震遠本身都有六呎高，廖宜康更加高人一等，有成六呎四。
講到第三樣，讀番書出身嘅張震遠話，之唔係「hip factor」囉，即係時尚咁解。楊志超係潮人，創辦「住好啲」，以「delay no more」為口號，推出一系列印有呢句諧音粗口嘅產品，Ｔ恤最好賣。張震遠攞埋「delay no more」呢個口號嚟發揮話，話「delay no more」會變埋市建局口號，第日市建局職員落區着住「delay no more」Ｔ恤，遇到示威人士就派埋畀佢哋，即係叫班地區人士同保育人士咪阻頭阻勢，阻住市建局嘅重建項目，明未？唔理白貓黑貓，捉到老鼠就係好貓，所以話之佢係咪粗口，總之啱用都可以成為市建局嘅口號！