中環出更：政商名人為慈善決戰觀瀾湖
高爾夫球運動除咗係政商界名人嘅社交場合外，仲發揮到慈善籌款功能，好似龍傳基金獲觀瀾湖高爾夫球會贊助，尋日喺觀瀾湖東莞會所搞咗個慈善高球賽，籌募經費支持五百名中學生到上海參觀世博。
高球賽吸引多名政商界好波之人落場較勁，包括保安局局長李少光、滙豐亞太區行政總裁王冬勝、中策集團主席馬時亨、金利來集團副主席曾智明太太黎瑞恩等，但最終不敵身為主人家嘅觀瀾湖二太子朱鼎耀（Tenniel）。
光哥謙虛唔認打波叻
今次慈善高球賽以四人一隊，每隊「入場費」最少捐出二萬元，由於有銀行界「梁朝偉」綽號嘅王冬勝與「光哥」李少光擔任高球賽主禮嘉賓，於是順理成章同埋一隊。「肥亨」馬時亨就同另外三個朋友合組一隊，黎瑞恩就代表有要事未能出席嘅老公曾智明上陣，聯同另外三個朋友組成一隊出賽。卓妮見幾隊人個個有姿勢、有實際，當中以肥亨打波嘅表情最鬼馬。
光哥與王冬勝嘅球齡都超過八年，以前都創下「一桿入洞」佳績，光哥更試過三年內兩次一桿入洞，享有「三年抱兩」嘅美譽，所以兩人落場保持一貫水準，打得遠之餘，仲係四至五桿就搞掂。不過，光哥好謙虛唔認打波叻，仲向王冬勝笠高帽話：「王冬勝打波好過我，佢先至係師傅呀！」王冬勝就自嘲打波「無定向風」，打得唔係好穩定，皆因以前打波主要同客人傾偈喎！
朱鼎耀姿勢實際並重
身為觀瀾湖高爾夫球會執行董事嘅朱鼎耀，佢領軍嘅隊伍相當神勇，奪得隊際淨桿獎冠軍，而佢自己就獲男子淨桿亞軍，身兼藝人高爾夫球會會長嘅黎瑞恩都唔執輸，奪隊際淨桿獎季軍及女子個人最遠距離獎。朱鼎耀十五歲開始學打高球，讀過高球管理，依家負責觀瀾湖嘅球場營運，佢好波就唔使多講，仲係有姿勢，有實際嗰隻，不過估唔到黎瑞恩都咁好波，原來佢九八年已開始打高球，至今最好成績係八十九桿，試過一次打老鷹，可惜未嘗一桿入洞滋味。佢話如果有幸打到一桿入洞，請食飯都無所謂喎！
今次球賽共籌得逾六十萬元善款，連同基金活動及籌募委員會副主席「媽打」李麗娟籌得嘅一百二十萬元，總數達一百八十萬元，將支持五百名家境貧困嘅中學生到上海世博參觀，媽打好滿意善款數字，但最頭痛係要喺二千五百名參加者篩選五百人出來。
卓妮