占士傷右手鬥綠軍惡搞

勒邦占士尋日再次發揮「全能王」本色,交出「準三雙」成績帶領騎士主場以96比94力壓公牛,並以總場數4比1淘汰對手闖入東岸次圈,但「大帝」賽後證實右手手肘受傷,下圈硬撼另一勁旅「綠軍」塞爾特人肯定唔易打。

勒邦占士今仗個人獨取19分、10個籃板球同9次助攻,不過佢連續兩場戴護臂上陣,喺比賽尾段更明顯唔多妥,射罰球要改用左手射到離行離列。賽後占士話唔知幾時整傷右手手肘,所以影響到佢喺下半場嘅發揮。

騎士闖關後,下一圈將會硬撼尋日主場以96比86擊敗熱火、總場數同樣贏4比1晉級嘅塞爾特人,重現08年東岸4強翻版戰。賽前騎士主將占美臣就呼籲隊友唔好輕敵:「好多人話塞爾特人球員好老,但我哋知道佢哋一定有備而來。呢一圈季後賽肯定好難打,但應該好好玩!」

哥羅福膺最佳第6人

同日有父母專程撐場嘅高比拜仁表現相當出色,喺佢指揮下,協助加素同拜林分別射入25同21分,令湖人主場以111比87大勝雷霆,總場數再次領先3比2,嚟緊只要贏多一場,就可以殺入西岸4強。另外,小牛主場以103比81擊敗馬刺,總場數拉近至2比3,聽日小牛作客馬刺,為保晉級生機,呢場絕對唔衰得。

最後,鷹隊後備哥羅福擊敗小牛嘅泰利同騎士嘅華拿祖,大熱姿態當選最佳第6人,真係恭喜晒!

本報綜合報道