《城市論壇》討論停車熄匙立法，咁有爭議性嘅話題，老實講，唔係病到癱癱腰，環境局局長邱騰華冇任何藉口唔出席。作為問責高官，首先要把自己變成避雷針而不是縮頭烏龜，你見過避雷針驚畀雷劈未？一個士兵，在戰場上害怕殺戮，只知躲避不敢應戰，心理上已輸，還打甚麼仗？邱局長不肯出席，情願去大嶼山植樹，這無疑是輕重不分。皆因植樹可假手於人，吾孫亦可代勞，而辯論不能假口於人，你要以理服人，舌戰維園阿伯阿哥，必須有點真本領，否則怎值年薪幾百萬？
再講，你唔去，還有個副局長潘潔，為何不叫她披甲上陣，做一次花木蘭無妨？淨係識潛水，終於搵咗個「專責處理停車熄匙政策」嘅公務員——環境保護署副署長陳嘉信頂硬上。你話煲呔曾嘅擴大問責制花大筆公帑不是倒錢落海嗎？出來齋噏幾句都驚青，你話香港邊會有藍天呀？
推行環保，並不需要甚麼「磊落奇偉之士」，但是，常人也必須有顆犧性小我的心，有誠意才可踏出環保第一步。作為推行環保第一線的問責官員，你要市民酷熱暑天停車熄匙，就要勇敢站出來，告訴大家你已做好準備，不怕大汗疊細汗滴濕鞋。
當年南開中學校長張伯苓見有學生煙抽得兇，說抽煙危害健康，小子何不戒之？誰知學生反問：「你不是也吸煙嗎？怎麼說我呢？」張伯苓聽了即叫校工將其所存呂宋煙當眾銷毀，並說：不如此不能表我決心，我與諸同學共同戒煙。自此，在校學生再沒吞雲吐霧的。要是正副局長說他們已踩單車上班，老朽車停火燄山也熄匙！