政情：田少拍心口聽員工意見
旅遊發展局去年推出員工考核「五級制」後，日前有前線員工投訴評核欠透明度，擔心造成擦鞋文化，令表現好嘅員工無薪加不特止，仲可能被炒。旅發局主席田北俊就澄清話，新評核制度有助激勵士氣，唔會出現「做又三十六，唔做又三十六」嘅情況，仲話如果員工對評核結果有強烈不滿，可直接向佢反映意見。
評核唔會閂埋門
田少話，旅發局總幹事劉鎮漢去年十月向內部員工公布新評核制度時，已先後召開九次小組會議，讓員工充分表達意見。對於有員工擔心新評核制度會造成擦鞋文化，田少話：「評核委員會內有十人做評核，就算有員工可以擦到其中一人對鞋，都擦唔到其餘九人對鞋，同時上司替下屬評核唔會閂埋門，會諮詢其他員工意見。」總之係有晒機制，非常嚴謹。
田少仲話，作為主席明白員工嘅擔心，但評級制公平公正，如果員工對評核有強烈不滿，可以直接搵佢反映喎！有田少拍心口，旅發局員工唔知會唔會放心啲呢？