政情：遊埠權四圍岳等收工

香港打工仔搵朝唔得晚，見到煲呔曾坐飛機去吓上海、行吓世博香港館，咁就每年四百萬元人工，真係唔知有乜感受。不過，煲呔曾連自己民望支持率跌到變淨值負十五個百分點都懶理，照樣離港周遊列國，市民嘅感受，佢更加視之為浮雲啦。

政改出爐 龜縮諗退休

煲呔曾本月廿六日離開上海之後，轉往江蘇考察，新華社尋日出稿，報道佢喺無錫市會見江蘇省委書記梁保華嘅情況，無甚足觀，反而，末段最引人注目，爆曾蔭權除咗去無錫，仲會周圍去睇吓，處處湖光山色，好似有六朝古都南京、揚州、泰州同以古典園林聞名天下嘅蘇州咁，本月三十日先至再返上海，出席世博會開幕式，到煲呔曾返到香港，簡直可以出本江蘇旅遊天書。

其實，煲呔曾呢鋪遊埠癮，自二月農曆新年之後，已經有迹可尋。翻查紀錄，煲呔曾喺二月十六日至十九日離港休假攤抖完，半個月後，佢喺三月七日至十日又休假，呢次仲悉心安排喺列席完北京「兩會」後；如果佢留喺北京度假，就連飛機票都慳埋。以為佢叉足電，應該安分做好佢份工啦，點知一個月唔到，三月三十一日至四月五日佢又再離港休假去。睇佢呢份悠閒心情，香港點似正值政改開戰、政治難安嘅多事之秋？

煲呔曾除咗正式休假，其他日子亦用到盡，好似佢四月六日、七日率團赴京出席「粵港合作框架協議」簽署儀式，跟住安排九日、十日去海南省出席博鰲亞洲論壇年會，咁中間八日嗰日佢喺邊度、又做咗乜嘢呢？真係問佢至知。

煲呔曾早前接受訪問時鬼拍後尾枕，自爆朝朝早都諗緊退休，其實佢既然咁想退休享清福，不如提早退休啦，咁樣就可以無牽無掛去遊埠，即使玩其一年半載，市民都唔會怪佢，反而望佢玩得開心啲，樂而忘返更好，咁就真係求仁得仁囉！