中環出更（一）：肥亨李維達打高球行善

清水灣鄉村俱樂部尋日第三年同靈實寧養院攜手合作，搞慈善高球賽籌款。身為俱樂部主席嘅養和醫院董事兼牙科部副主任李維仁醫生，孖堂細佬、養和醫院董事局主席暨院長李維達醫生同佢嘅仔女李明、李雅婷組成一隊出戰。嚟做善事嘅中策集團主席馬時亨，就為佢嗰隊打出第一隻小鳥，開心到飛起，大家過足球癮兼做善事，一舉兩得！
（左起）李維達、李明、馬時亨、李維仁、李維文、陳庭川醫生、陳庭川太太以及李維文太太，開波前飲茶聯誼，先禮後兵。 （葉華英攝）
（左起）李維達、李明、馬時亨、李維仁、李維文、陳庭川醫生、陳庭川太太以及李維文太太，開波前飲茶聯誼，先禮後兵。 （葉華英攝）

要贏今次嘅比賽，每隊最少要打出十隻小鳥。肥亨同基督教靈實協會行政總裁林正財醫生、俱樂部總經理范殿夫同職業球手Paul Riley同隊，第一隻小鳥就喺肥亨嘅球桿下飛出，肥亨開心到飛起，周圍同人擊掌歡呼。鍾意打高球嘅肥亨雖然唔係呢個俱樂部會員，不過偶然都會嚟打波，佢話呢個場除咗有一個全球排五百名內嘅洞之外，尋日仲係最安全嘅場，事關好多醫生喺度，打得好安心。

為靈實寧養院籌款

今次嘅慈善賽不設個人成績，以Texas Scramble方法計分。每位落場嘅選手都係善長，事關佢哋要捐五千蚊先可以參賽，所以二十七對加埋，就為靈實寧養院籌咗五十萬做善終服務。雖然最後肥亨同李維達醫生嗰兩隊都飲恨三甲不入，不過做咗善事幫到人，一樣富足。

馬時亨打出小鳥，開心到舉手歡呼！
  • 馬時亨打出小鳥，開心到舉手歡呼！
（左起）Paul Riley、范殿夫、林正財睇馬時亨（右二）打波，大家都好專注。
  • （左起）Paul Riley、范殿夫、林正財睇馬時亨（右二）打波，大家都好專注。
（左起）李維仁與李明、李維達、李雅婷都係高球愛好者，李維仁同李維達仲試過一桿入洞添。
  • （左起）李維仁與李明、李維達、李雅婷都係高球愛好者，李維仁同李維達仲試過一桿入洞添。

清水灣鄉村俱樂部依家係香港唯一一個集高球同遊艇會嘅俱樂部，會籍要三百萬，不過要入會絕不容易，事關佢哋已經唔再接受新會員申請，依家只係得二千幾個會員。俱樂部經歷過興衰起跌，仲試過破產，所以入咗會十幾廿年嘅李維仁主席，對俱樂部感情深厚，每星期嚟打兩次波，當正返屋企，十幾年前仲試過一次一桿入洞添；佢堂細佬李維達醫生亦喺沙士期間打出同樣佳績，不過李維達醫生話，當年贏波嘅成本無堂阿哥咁高，事關一嚟沙士肆虐，請都唔到；二嚟佢話買咗保險，所以贏波請食飯claim得番，認真識講笑！

卓妮