政情：行會成員5.16各有各忙
早前我哋講過建制派政黨民建聯杯葛立法會5.16五區補選嘅板斧，今日我哋就講吓身為建制派一部分嘅行政會議點應對。尋日行政會議開完會後，查史美倫斬釘截鐵同我哋講，5.16當日佢要出席一個喺北京舉行嘅活動，所以唔能夠留喺香港投票喇。至於夏佳理早前都講過，尋日佢再一次確認，5.16當日佢要飛去菲律賓為親家賀壽，換言之又係唔會去投票。
楊敏德聞補選笑而不語
除咗兩個篤定唔去投票嘅行會成員外，楊敏德都話佢成日要出門，暫時未確定5.16會唔會離港；不過反應敏捷嘅佢好快諗起當日係補選投票日，所以當大家追問佢當日若然喺香港嘅話，又會唔會去投票嘅時候，佢就笑而不語，大家心領神會啦！
同楊敏德答案相近但反應迥異嘅，有身兼中文大學校長嘅劉遵義，佢都係話唔知5.16自己會唔會喺香港，不過一聽到「補選」兩個字，佢即刻加快腳步上車鬆人。中央都定性所謂嘅五區「公投」違反《基本法》，劉遵義本身係全國政協委員，大家都應該估到佢會唔會去投票喇！