政情：The Lily記招龔家齊現身撐場
華懋集團已故前主席王龔如心嘅胞妹龔中心，尋日首次以集團董事身份主持旗下淺水灣道物業The Lily嘅命名同出租記招，龔中心話，The Lily係姐姐龔如心生前最記掛嘅事情之一，佢自己希望能完成這項以逾百億元打造嘅淺水灣豪宅項目，了卻胞姊嘅遺願。記者會喺淺水灣道129號嘅The Lily現場舉行，龔家上下齊撐場，除咗龔如心嘅妺妹龔中心及龔因心之外，現任華懋集團主席龔仁心夫婦都有到場，但龔仁心夫婦稍作逗留後便以趕開會為由離開。
打造淺水灣新地標
龔中心以「漫長的十年、裏裏外外、深深的懷念」作開場白，佢話當年姐姐王太因為愛香港，抱着志在必得嘅心態，喺九七年回歸後首個政府賣地場合，以天價55.5億元投得淺水灣道129號地皮，其後更親自到英國搵著名建築大師福斯特（Norman Foster）設計物業。
龔中心仲披露咗鮮為人知嘅往事，話說五五年九月廿九日，當年年僅十九歲嘅龔如心下嫁王德輝，婚後翌日正係中秋節，佢哋夫婦二人就喺淺水灣沙灘度過婚後生活嘅第一個中秋節，呢個正係龔如心鍾情淺水灣嘅原因，所以佢哋決心將物業打造成淺水灣新地標。