政情：三「內鬼」險拉倒林健鋒

政改小組會建制派「冧友」二十三人加入，民主派只有八人，實力懸殊，劉慧卿爭做副主席，本來姿態高於實際，但最後卻假戲真做，差啲又受惠於建制派倒戈。

尋日有份投票嘅建制派有十三人，民記六個，仲有經濟動力Jeffrey同梁君彥，加上工聯會王國興、「法律超人」謝偉俊、葉劉淑儀同專業會議嘅何鍾泰與劉秀成。而民主派就有五個，卿姐等民主黨三人加公民黨兩個。咁嘅牌面，輸贏幾成定局，一如所料，譚耀宗以十三票對五票撼低劉慧卿，當選主席。選完主席選副主席，點知選舉結果揭盅，Jeffrey得票十張，劉慧卿突然多三票，即係話，有三名建制派倒戈，暗投劉慧卿。嘩！如果當時建制派有兩個人去廁所，結局隨時改寫。

葉劉何鍾泰劉秀成嫌疑大

Jeffrey走失三票，可能連佢自己都感意外。一場唔多起眼嘅政改小組會副主席選舉都險象環生，唔知Jeffrey會唔會暗中捉鬼？眾所周知，民記同工聯一向聽指令投票，梁君彥唔會跣黨友，有人實牙實齒話目擊謝偉俊投咗畀Jeffrey，即係話，葉劉、何鍾泰同劉秀成嫌疑較大。而原因亦不外乎兩個，第一，有人認為立法會嘅重要委員會正、副主席，應由建制派與民主派均分；第二，可能同上星期預算案表決辯論背後Jeffrey同人「霎氣」有關。

事緣辯論預算案前幾日，Jeffrey同幾名功能組別議員放晒聲氣，要求建制派同僚減少發言，以免預算案拖到咁夜表決，據聞好多建制派議員不滿，辯論當日，專業會議梁美芬同謝偉俊呻到出面，指預算案咁重要，無理由唔畀人講嘢㗎！尋日有人倒戈唔撐Jeffrey，唔知係咪想替黨友出氣呢？

葉劉同劉秀成異口同聲指，暗票制度下投票取向要保密。葉劉話，Jeffrey之前無向佢拉票喎；劉教授就話，從過往紀錄，都見到有議員想正、副主席由建制派同民主派均分㗎啦，叫大家唔使咁驚奇咁話喎！