中環耳目：梁家駒愛中華游樂會海鮮
中國平安保險首席保險執行官梁家駒（Dominic）係保險業老行尊，佢由保誠大中華區行政總裁跳槽至今，眨吓眼已經六年幾。舊年平保勁賺一百三十幾億元人民幣，Dominic掌管嘅保險業務就貢獻咗超過七成，實要記佢一大功啦！當年游說佢過檔嘅平保董事長馬明哲果然冇睇錯。
Dominic平時喺深圳返工，一星期得兩、三日喺香港。佢同卓妮講，好掛住香港嘅住家飯，返港期間如果冇應酬，佢會同老婆喺屋企撐枱腳食家常便飯。不過逢周日工人放假，佢哋就會去大坑道嘅中華游樂會中菜廳食飯，一、兩星期總有一次喺度開餐，最喜歡佢哋嘅蟶子同埋清蒸老虎斑。
近百年歷史
Dominic嘅屋企就喺大坑道，揸車落會所只需三分鐘，因為方便所以入咗呢個香港最早、有近一百年歷史嘅私人會所。佢鍾意喺度舉重、做運動 ，難怪身材保持得咁好。佢笑稱出外食飯由老婆大人負責點餸，佢淨係識得夾餸食，食嘢最緊要清淡，所以至愛食材都係魚、豆腐同青菜！