中環出更（－）：肥胡識飲2500元歎靚香檳
香港總商會下月底舉行換屆選舉，如無意外，常務副主席胡定旭將坐正升呢做主席，成為總商會大舵手。夾都冇咁啱，卓妮上周一下午四點幾鐘就喺中環和記大廈門外遇到肥胡，見佢急急腳走咗入屈臣氏酒窖，好熟架步咁走到香檳貨架，最後買咗支靚香檳離開，莫非咁快就要開定香檳慶祝榮升做主席？
買嚟同朋友食晚飯
以肥胡實力，當選主席無難度，但肥胡話目前仍言之尚早，要到選舉後才知道結果喎，所以談不上要預早慶祝。其實肥胡當日只係約咗朋友食晚飯，但因為下午要開會，趕唔切返屋企攞啲私伙珍藏，所以要去屈臣氏酒窖買支酒做手信。卓妮見肥胡左揀右揀之際，職員就向他推介Moet Chandon 1990年Dom Perignon香檳王，話可以即開即飲。
肥胡攞起支酒望咗兩望就扑錘購買，原價二千九百八十元，八五折後折實二千五百三十三元。話時話，唔係個個客都有八五折，只有金卡會員尊享呢個待遇，每年消費超過五萬元就會自動成為金卡會員，即係話肥胡每年買酒超過五萬元，但持有會員號碼買酒同樣可獲八五折。
講番肥胡買嗰支Dom Perignon，為世界知名頂級香檳之一，1990年更係香檳生產嘅好年份，香檳嘅金黃色氣泡，散發陣陣果香，不但香氣持久，入口果香依然，餘韻悠長，享有「香檳王」嘅美譽。
Dom Perignon香檳釀製後會存放於恒溫酒窖最少六至八年，之後才推出市場出售，有部分香檳仲會繼續存放十二至十六年，成為頂級佳釀Dom Perignon Oenotheque，當然身價都不同凡響啦！
卓妮