政情：黑英解構塱原「勢力」
自嘲正處於「退休過度活躍期」嘅前天文台台長林超英（黑英），今年初喺個人網誌《草雲居》撰文，質疑「有勢力人士」逼政府同意以綜合發展為名，於極有保育價值嘅塱原濕地建屋，言論引起極大回響。有立法會議員書面要求發展局局長林鄭月娥解釋，林鄭亦搵規劃署問過黑英，尋日終於向立法會作出書面回覆。
林鄭喺回覆中，話規劃署主動聯絡過黑英，話「有勢力人士」係泛指新界東北發展研究第一階段公眾參與期間，提出「保育塱原同時仲要顧及土地業權人權益」意見嘅人士。簡單啲講，即係「有勢力人士」要求政府保育塱原時要顧及土地業權人權益，容許土地業權人喺塱原濕地上建屋。
雖然林鄭喺回覆中強調最終會以公眾利益為依歸，但佢已透露政府會透過規劃申請制度考慮私人參與可融合自然生態環境嘅發展，達到善用土地資源、平衡保育與及發展需要。私人參與發展係咪包括埋建屋呢？莫非真係有「有勢力人士」成功迫使政府容許喺塱原建屋？