政情：單仲偕老實話遭圍攻
「八十後」呢個議題熱爆社會，尋日就有團體搞咗個研討會，剖析「八十後」現象。老實說話唔係人人鍾意聽，民主黨副主席單仲偕話即使爭取到普選，亦未必代表可以選出一個好政府喎。此話一出，單仲偕旋即成為圍剿嘅對象，仲畀人話佢身為民主黨副主席，竟然唔識民主！
單仲偕喺會上話，日本首相鳩山由紀夫、美國總統奧巴馬同台灣嘅總統馬英九三人都以高民望當選，可惜一年過後，三人嘅民望都跌至三成，質疑即使有普選都未必能夠解決所有問題。大家聽完單仲偕呢番話都Ｏ晒嘴，前高官王永平仲話，爭取普選係為咗提高政府嘅問責性，狠批佢連最基本嘅民主元素都搞唔清，社民連主席陶君行亦感到匪夷所思，「佢身為民主派最大黨嘅副主席，講埋啲咁嘅嘢，唔怪得港人覺得冇政黨代表到佢哋啦！」
阿陶亦喺會上自爆，話以前同長毛示威時，通常遞完信就好快走人落蘭桂坊飲酒，但同班「八十後」抗爭就好唔同嘞，「我永遠都唔知佢哋幾時先肯走，搞到我老婆成日打嚟問我幾時先返去食飯！」